2018 جىلعى 8 تامىزدا ق ر ۇلتتىق مۋزەيىندە حح عاسىردىڭ ەڭ تانىمال جانە بەدەلدى شەبەرلەرىنىڭ ءبىرى – پابلو پيكاسسونىڭ بىرەگەي  كورمەسى اشىلدى.

قازاقستان رەسپۋبليكاسى مادەنيەت جانە سپورت مينيسترلىگى ۇيىمداستىرعان «پابلو پيكاسسو. ۆوللوريستىك سەلەستينا مەن كەراميكا» ەكسپوزيسياسى استانانىڭ 20-جىلدىعىنا وراي وتكىزىلدى.

كورمەنىڭ اشىلۋ سالتاناتىندا ءسوز العان ق ر مادەنيەت جانە سپورت ءمينيسترى ارىستانبەك مۇحامەدي ۇلى: «استانا قالاسىنىڭ 20 جىلدىعىنا وراي ارنايى ۇيىمداستىرىلعان «پابلو پيكاسسو «سەلەستينا جانە ۆالوريستىق كەراميكا» حالىقارالىق كورمەسى –  شوقتىعى بيىك مادەني شارالاردىڭ ءبىرى. ۇلتتىق مۋزەيدىڭ اشىلعانىنا از عانا جىلدار بولسا دا، وسىنداي دۇنيەجۇزىنە بەلگىلى تۇلعالاردىڭ كورمەسىن وسى جەردەن كورىپ جاتىرمىز. ول ءبىز ءۇشىن ۇلكەن قۋانىش. پابلو پيكاسسو –  تەك سۋرەت ونەرىنىڭ عانا ەمەس، سونىمەن قاتار، بۇكىل تىرشىلىك كوشىنىڭ، جالپى ادامزاتتىڭ دامۋىنا ۇلكەن ۇلەس قوسقان تۇلعا. مىنا عاجايىپ الەمنىڭ سۇلۋلىعىن قىلقالاممەن قاعاز بەتىنە ءتۇسىرىپ، وعان ەرەكشە ءار بەرە ءبىلۋ ەكىنىڭ قولىنان كەلەتىن ءىس ەمەس. سۋرەت ونەرى – تابيعات تارتۋ ەتكەن تالانتتى جاندارعا تيەسىلى دەسەك، پابلو پيكاسسو سونداي تالانت يەسى»، –  دەدى.

كورمە بارىسىندا قالا قوناقتارى مەن تۇرعىندارى كوركەم  كەراميكا مەن پيكاسسو گراۆيۋرالارىنىڭ سيرەك كورسەتىلەتىن كوللەكسياسىن تاماشالاۋعا مۇمكىندىك الدى. قۇمىرالار، تاباقشالار، ساۋىتتار، ەرتەگىدەگى قۇستار مەن ميفتىك جاراتىلىستار – ۇلى شەبەر ەكىنشى دۇنيەجۇزىلىك سوعىستان كەيىن تۇراقتاعان فرانسيانىڭ وڭتۇستىگىنىڭ عالامات شۋاقتى پەيزاجدارىنداي كوز تارتادى.

يتاليانىڭ قازاقستانداعى ەلشىسى پاسكۋال د^،اۆينو: «بۇگىنگى شارانىڭ ۇيىمداستىرىلۋى مەن ءۇشىن ۇلكەن قۋانىش. وسىنداي مادەني شارالار ءتۇرلى ۇلتتاردىڭ ءبىر ارنادا توعىسىپ، ءوزارا تىلدەسۋىنە، تۇسىنىسۋىنە سەبەپ ەكەنى انىق. ۇلتتىق مۋزەيگە قويىلعان بۇگىنگى كورمەنىڭ ماڭىزى زور. الەمگە ايگىلى پابلو پيكاسسونىڭ جەكە كورمەسى قازاقستاندا تۇڭعىش رەت ۇيىمداستىرىلىپ وتىر. كوركەم تۋىندىلار كوپتىڭ كوڭىلىنەن شىعىپ، مۋزەي قوناقتارىن قۋانتادى دەپ ۇمىتتەنەمىز»، - دەدى.

1946 جىلى ۆوللوريستە جىل سايىن وتەتىن كەراميكا كورمەسىنە بارعان پابلو پيكاسسو، سول جەردەن شابىت الىپ، ءتورت مىڭنان اسا دەكوراتيۆتى كەراميكالىق فورما جاساعان. پابلو پيكاسسو تانىس زاتتاردىڭ ۋتاليتارلىعىن بىرەگەيلىك، دارالىق پەن كوركەم تۋىندىنىڭ سيقىرلىعىمەن بىرىكتىرە الدى. شەبەر كوزەشى شارىعىن پايدالانباعان. ونىڭ ساۋىتتارى مەن كەسەلەرى ءوزىنىڭ ادەيىلەپ جاسالعان فورمالارىنىڭ ارقاسىندا ادەمى، تۇتاس جانە تىلسىم ءھام تارتىمدى ارحايكالىق ءمۇسىن ونەرىن ەسكە تۇسىرەدى.  وسى كوزتارتارلىق، ءمىنسىز پىشىندەرگە وي جۇگىرتىپ قاراساق، عاجايىپ قۇستار مەن اڭداردىڭ ءتىرىلىپ، ال ءتۇر-تۇسسىز كەراميكادان جاسالعان مۇسىندەرگە جان ءبىتىپ، ادام كەيىپىنە ەنەتىنىن ەلەستەتەمىز، ادەتتەگى قاراپايىم وبرازدار قايتالانباس تۇتاس تاريح رەتىندە كوز الدىمىزعا كەلەدى.

پيكاسسونىڭ بۇل جۇمىستارى – اۆتورلىق كەراميكانىڭ العاشقى تاجىريبەسى ەمەس. ۆوللوريستىك كەراميكانىڭ بەسىگى – «مادۋرا» كەراميكالىق شەبەرحاناسى ءالى كۇنگە دەيىن بار.

مادۋرا شەبەرحاناسىنىڭ بۇيىمدارىن ساتىپ الاتىن كوللەكسيونەرلەردىڭ تۋىندىلارىندا مىندەتتى تۇردە Edition Picasso («پيكوسسو قولىنان شىققان») جازۋى مەن ءنومىرى بار. بۇل كورمەگە 32 ءتۇپنۇسقا  ەكسپونات ۇسىنىلدى، ولارعا دا جوعارىدا اتالعان بەلگىلەر قويىلعان.

كورمە 2018 جىلعى 3 قاراشاعا دەيىن جالعاسادى.